V5MAT-6001 Matematihkka 1- joatkkaoahppun 5.-10 ceahki vuođđoskuvlaoahpaheddjiide

• Oahpu lágideapmi: Neahttadoarjjaoahpahus: Oahpus leat sihke fysalaš deaivvadeamit Sámi allaskuvllas ja neahttaoahpahus. Fysalaš deaivvademiid ii leat vejolaš čuovvut neahta bokte.
• Oahpahusgiella: Davvisámegiella lea váldo oahpahusgiella. Dárogiella ja eaŋgalasgiella sáhttet adnot guosselogaldalliid bokte.
• 30 oahppočuoggá
• Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Matematihkkafágas galget studeanttat ovdánahttit fágagelbbolašvuođa ja máhtu fágadidaktihkas, mii čatnasa fáttaide mat leat relevánta 5.–10. ceahki oahpahussii. Matematihkkadidaktihka oahpahus lea dutkanvuđot ja lea heivehuvvon sámi skuvllaid oahpaheapmái. Fága vuolggasadji lea sápmelaččaid ja eamiálbmogiid diehtu ja máhttu, ja daid mearkkašupmi matematihkkafága oahppamii lea guovddážis fágas.

Studeanta galgá oažžut nanu ja reflekterejeaddji ipmárdusa dan matematihkkii maid ieža galget oahpahit, ja maid movt oahppit ovdánahttet iežaset matematihkkaipmárdusa.

Gáibádusat beassat eksámenii:

• Studeanta galgá oassálastit unnimusat 80% lágiduvvon oahpahussii deaivvademiin ja neahttaoahpahusas.
• Fágamáhppa: Bargobihtát maid fágaoahpaheaddji addá čuovvovaš fáttáin, galget dohkkehuvvot ja biddjot fágamáhppii:
  1. Geometriija
  2. Logut ja algebra
  3. Ovttamađodagat
  4. Statistihkka
  5. Kombinatorihkka ja jáhkehahttivuohta
  6. Funkšuvnnat
• 2-3 siidosaš reflekšuvdnačálus mas studeanta reflektere iežas oahppama matematihkkafágas ja kultuvrii vuođđuduvvon oahpahusa ektui
• 4-5 siidosaš matematihkkadidaktihkalaš teaksta mii čájeha čanastaga gaskal oahppoplána, iežas oahpahusa ja ohppiid barggu. Galgá ovdanbuktot semináras. 
• Semináras ovdanbuktit iešválljejuvvon fágalaš fáttá dahje fáddái čadnon oahppanaktivitehta (loguin, algebras, geometriijas, funkšuvnnain, statistihkas, kombinatorihkas dahje jáhkehahttivuođas).

Eksámen:

Eksámenis leat guokte oasi:

1. 6-diibmosaš skuvlaeksámen mas deaddu lea matematihka fágas. (50 % deaddu loahpalaš árvosánis)

2. 5-beaivásaš ruovttueksámen mii sáhttá čađahuvvot oktagaslaččat dahje joavkkus. Eksámena čálalaš dahje praktihkalaš boađus ovdanbukto eksámensemináras. Studeanttat ja fágaoahpaheaddjit sohpet eksámena hámi. (50% deaddu loahpalaš árvosánis)