Ole Henrik Magga oaččui Sámiráđi gudnebálkkašumi.

Sámiráđđi juohká gudnebálkkašumi juohke njealját jagi. Bálkkášupmi lea gudnin dasa gii lea erenoamáš mearkkašahti leamaš sáme oktavuhtii ja kultuvrii. Dat dáhpahuvai ikte 21. Sámekonfereanssa oktavuođas Troandimis, Tråante2017 ávvuváhkus.

Sámiráđi presideanta Áile Javo čilgii ná, ovdalgo bivddii Ole Henrik Magga lávdde ala:

Son gean mii odne gudnejahttit lea dákkár geainna mii buohkat čevllohallat. Ii son leat dušše midjiide sámiide leamaš njunuš ja pioneara, muhto sus lea alla násti maid eamiálbmogiin miehtá máilmmi su riikagaskasaš doaimmaid dihte.

Sámi allaskuvlla Professor Emeritus Ole Henrik Maggai lei oalle erenoamáš oažžut dán gudnebálkkášumi.  
– Munnje mearkkaša dát erenoamážit. Mun gal lean ožžon eará bálkkašumiid maid, muhto dat ahte oažžut bálkkašumi Sámiráđis, min iežamet álbmoga oktasaš orgánas, dat lea stuorimus maid sápmelaš sáhttá oažžut, muitalii Magga NRK Sápmái.

– Sámi allaskuvla lea rámis go Ole Henrik lea ožžon dán bálkkášumi, dadjá Sámi allaskuvlla rektor Gunvor Guttorm.