Gávccinuppelohkái studeanta leat gárven bachelordási oahpu ja golmmas leat gárven masterdási oahpu.

Leigga Sámi allaskuvlla dekánat geat doalaiga sátnevuoruid studeanttaide. Sártnistis studeanttaide dajai Marit Meløy (Giela, Duoji, Boazodoalu ja servodatdiehtagiid goađi jođiheaddji) ná:

-Lea din studeanttaid iežadet ánssu go lehpet dál buvttehan ja juksan dán muddui go lehpet. Mun sávan ahte dii dovdabehtet ahte lehpet ožžon nana sámegielat fágagelbbolašvuođa ja ahte lehpet ahtanuššan olmmožin ja ovdánan fágalaččat.

Son neavvui studeanttaid earret eará dahkat dan mii alcces orru riekta, ja muittuhii ahte lea vejolaš máhccat akademiijai.

- Vállje dan bálgá mii dutnje lea riekta justa dál. Vaikko válljet dan bargobálgá dál guorragoahtit, de dat ii mearkkaš ahte it sáhte máhcat akademalaš bálgái fas maŋŋel. Olbmo eallimis rahpasit álo vejolašvuođat.

Seija Risten Somby fuomášuhtii sártnistis ahte Sámi allaskuvla fargga ávvuda 30 jagi. 

-Máŋgasat dis studeanttain eai lean vel riegádange dalle. Dattetge mis lea ain dat akademalaš sohkabuolva, geaid lea giitámuš ahte odne beassat iežamet gillii ja iežamet árvovuođu geažil čađahit oahpuid ja prográmmaid. 30-jagis mii leat olahan viiddes ja fágaidrasttildeaddji dutkamušaid. Daiguin sáhttit láhčit saji min studeanttaide beassat čiekŋudit alccemet relevánta ja beroštahtti sisdoaluide ja fágaide, mat leat váibmosis sámi ja eamiálbmot servodagain.

Marit Meløy giittii studeanttaid go válljejedje Sámi allaskuvlla oahppobáikin.

-Dalle juo go válljiidet álgit Sámi allaskuvlii ohppui, de lehpet čielgasit vuoruhan ja válljen deattuhit sámi ja eamiálbmot perspektiiva ja sámegiela. Ja Sápmi dárbbaša din gelbbolašvuođa. Olu lihkku!

Gárven gráda Sámi allaskuvllas:

VUO1-7 Sámi vuođđoskuvlaoahpaheaddjioahppu 1-7 ceahkki
- Påve, Edith Anne
- Soleng, Gisle Nergård 

VUO5-10 Sámi vuođđoskuvlaoahpaheaddjioahppu 5-10 ceahkki
- Eira, Kirsti Monica Olesdtr.
- Hætta, Anna Margrethe Bæhr
- Utsi, Berit Marie
- Buljo, Elle Nilsdtr

MOA Sámi mánaidgárdeoahpaheaddjioahppu
- Vars, Marit Kristine Olesdtr.
- Vars, Sara Ellen Olesdtr.
- Buljo, Marit Nilsdtr.
- Bæhr, Berit Ragnhild A.

JOU 300 Sámi journalistihka master álgoálbmot perspektiivvas
- Leukumaavaara, Jenni
- Njoroge, Everline
- Paltto, Aslak Antti

BASAM Sámegiela ja sámi girjjálašvuođa bachelor
- Eira, Inger Helene Anti
- Eira, Risten Inga
- Logje, Ina Marie
- Näkkäläjärvi, Juulienna
- Kopra, Anni Sofia Charotte

BAGRA Friddja bachelorgráda
- Eira, Inger Marit Anne (Duoji čiekŋudeapmi)
- Logje, Inger Marlene (Sámegiela čiekŋudeapmi)
- Ohhashi, Kohji (Sámegiela čiekŋudeapmi)