Sámi allaskuvlla rámmaruhtadeapmi lassána 6,8 miljon ruvnnuin (7 %). Ovddit jagiid buorit studeantalogut ja ođđa sámegiela álgooahpu ođđa studeantasajit dat čilgejit lassáneami.

Lassáneapmi lea čadnon guovtti váldooassái: vuođđorámmii ja boađusjuolludeapmái.

Sámi allaskuvlla vuođđorámmii addo lassáneapmi mii galgá gokčat hadde- ja bálkálassáneami.

Dasa lassin almmuhuvvui giđđat ahte Sámi allaskuvla oažžu liige juolludeami ásahit logi ođđa oahpposajiid sámegiela álgoohppui, mii addá 1,4 miljon ruvnno lassaneami. Dan mielde maid čuovui stipendiáhtavirgái ruhtadeapmi, oktiibuot 450 000 ruvnno.

Boađusjuolludeami lassáneapmi lea čadnon studeantalohkui ja dutkamii 2019s. Studeantalogu oassi stuorru 2,7 miljon ruvnnuin, earenoamážit dan geažil go allaskuvla bures lihkostuvai sihke alla studeantaloguin ja buori kandidáhttabuvttademiin. Unnit EO-ruhtadeami ja unnit dutkanalmmuheami geažil aŋkke gesso ruhtadeamis 538 000 ruvnno boađusjuolludeamis.

Go visot dáid bidjá oktii, de bušeahttalassáneapmi lassána 7 proseanttain, dehe 4 proseantta lassin haddegoargŋuma.