Sámi allaskuvllas ja Norwegian Craftsas lea ovttasbargu buvttadit antologiija mas čiekŋudit duodjái, ja mii lea máŋgga gillii. Antologiija doaimmaheaba Gunvor Guttorm, duodjeprofessor ja Harald Gaski, sámekultuvrra ja girjjálašvuođa professor. Antologiija almmuha sámi lágadus Davvi Girji 2021:s.

Antologiijas leat logi vuođđoteavstta máid sámi duojárat, dáiddárat ja akademihkkárat leat čállán. Teavsttat gaskkustit sihke historjjálaš ja dáláš máhtu duojis ja sámi estetihkas, hervendáidagis, kultuvrras ja eallinvuogis. Dán čoakkáldaga teavsttat almmuhuvvojit dál vuosttaš geardde máŋgga sámegillii ja lassin vel eŋgelasgillii.

Duodji lea erenoamáš danin go dat fátmmasta olles sámi eallinvuogi. Vuođustis dat lea geavatlaš, muhto movttiidahttá maiddá árvvoštallat sámi vásáhusaid ja áddejumi viiddit teorehtalaš geahčastagas. Duodji lea seammá áigge sihke árbevirolaš ja ođasmahtti, ja ovttas juoigamiin dat ovddasta guovddáš sámi gullevašvuođa ja áibbašeami. -Harald Gaski.

Odne lea stuorra beroštupmi duodjái, mii leat čeahppumin atnit duoji máhtuid ja dieđuid árvvus, ja oainnusin dahkat daid. Nuorran go bargagohten dujiin, ii lean nu dábálaš ahte nuorra olmmoš vállje duodjeoahpuid váldit, eaige gávdnon nu máŋga ásahusa gos sáhtii ohcat doarjaga. Dalle gárte eallilan duojárat munnje dehálaš doarjaleaddjit. Duoji áigi lea dál, nugo ovdalgege, muhto eará láhkai. -Gunvor Guttorm

Go jorgala sámegillii sámi girječálliid teavsttaid mat leat čállojuvvon dušše davvirikkaid gielaide ja eŋgelasgillii, de mii sáhttit fállat dehálaš sámi máhtu duojis, sámi kultuvrras ja estetihkas ođđa sámegielat geavaheddjiide. Dasa lassin sáhttá eŋgelasgillii jorgaleapmi veahkehit sámi duoji olahit ođđa berošteddjiid rikkaidgaskasaš dásis. -Hege Henriksen, direktevra Norwegian Crafts.

• A new anthology on duodji by Sámi Allaskuvla and Norwegian Crafts