Sihke ođđa studeanttat ja studeanttat mat ovdal leat lohkan Sámi allaskuvllas, galget dál ožžon dieđu ahte leat beassan ohppui masa leat ohcan. Bures-boahtin-reive lea sáddejuvvon e-poastan studeanttaide mat leat álgime ohppui (muitte iskkat e-poasta ruskalihtis jus it leat ožžon).

Lohkanbadjedivat
Vuosttaš máid ferte bargat maŋŋil go leat dohkkehan oahpposaji, lea máksit lohkanbadjedivada. Dieđut dan birra leat e-poasttas maid leat ožžon. Go dan leat máksán, de sáhtát easka dieđihit iežat studeantan. Fuomáš ahte sáhttá mannat jándora dan rájes go leat máksán, dassážii sáhtát dieđihit studeantan.

Dieđihit studeantan
Dieđit iežat studeantan studentweb bokte. Studeantadieđiheapmi addá láigohanvuoigatvuođaid Sámi allaskuvlla girjerádjosii ja vuoigatvuođaid čoavddakortii.

FUOMÁŠ! Jus it leat Norgga ássi, de fertet váldit oktavuođa Sámi allaskuvlla oahppohálddahusain oažžun dihte beassannummara ja pin-koda.

IT-konto
Ásat alccat IT-konto, nu maid šattat FEIDE-geavaheaddji, mii adno studeantaduođaštus-appa, Eduroama ja Digigiisá sisaloggemii. IT-konto ráhkadat dáppe. 

Studeantaduođaštus-app
Maŋŋel go leat máksán ja dieđihan iežat studeantan ja ásahan IT-konto, de sáhtát geavahit mátketelefuvnnas studeantaduođaštus-appa. 

Čoavddakoarta
Ođđa studeanttaide ráhkaduvvo čoavddakoarta Sámi allaskuvlla ovdakantuvrras, Diehtosiidda boađáhagas. Jus it sáhte boahtit Sámi allaskuvlii ráhkadahttit koartta, de sáhtát diŋgot koartta oahppohálddahusas. Sáddet nama ja gova namuhuvvon e-boastačujuhussii. Čoavddakoarttain beasat Diehtosiidii ja dat doaibmá luoikkahankoartan Sámi allaskuvlla girjerádjosis. 

Loatna ja stipeanda
Go leat oahpposaji ožžon, de sáhtát ohcat oahppoloana ja stipeandda. Loatnakássas lea sierra ohcanskovvi ja áigemearit ohcat oahppoloana ja stipeandda. Go leat máksán lohkanbadjedivada ja registrerejuvvon studeantan, de Sámi allaskuvllas manná automáhtalaččat diehtu loatnakássii ahte leat min studeanta.

Fuomáš ahte 2019 čávčča rájes leat njuolggadusat rievdan dasa mii guoská goas loatna rievdá stipeandan. Eambbo dieđuid ja ohcanskovi gávnnat Loatnakássa ruovttusiiddus.

Jus dus leat jearaldagat álgima ja oahpuid birra, de váldde áinnas oktavuođa Sámi allaskuvlla oahppohálddahusain. E-poasta: oahppohálddahus@samiskhs.no, telefuvdna +47 78448400 dahje fina Diehtosiiddas.